மீண்டும் தாமதமான ஜனநாயகன்
மிகுந்த எதிர்பார்ப்பில் இருக்கும் ‘ஜனநாயகன்’ திரைப்படம் மீண்டும் ஒரு முறை தாமத சிக்கலில் சிக்கியுள்ளது. விஜய் நடித்துள்ள இந்த படத்திற்கு இன்று நடைபெறவிருந்த மறு தணிக்கை கூட நிறைவேறாததால், ரசிகர்கள் கடும் ஏமாற்றத்தில் உள்ளனர். மார்ச் 9-ஆம் தேதி மறு தணிக்கை நடைபெறும் என அறிவிக்கப்பட்டிருந்தது. ஆனால் குழு உறுப்பினரின் உடல்நலக்குறைவு காரணமாக அது மார்ச் 17-ஆம் தேதிக்கு தள்ளிவைக்கப்பட்டது. அதற்குப் பிறகும் மறு தணிக்கை நடைபெறவில்லை என்ற தகவல் வெளியாகியுள்ளது.
பொங்கல் ரிலீஸ் கனவு கலைந்தது H.வினோத் இயக்கத்தில் உருவாகியுள்ள ஜனநாயகன் திரைப்படம், கடந்த ஜனவரி 9-ஆம் தேதி பொங்கல் பண்டிகையை முன்னிட்டு வெளியாகும் என அறிவிக்கப்பட்டிருந்தது. ஆனால் தணிக்கை சான்றிதழ் கிடைக்காத காரணத்தால் படம் வெளியீடு தடைபட்டது. அதன் பின்னர் தொடர் தாமதங்கள் ஏற்பட்டதால், ரசிகர்கள் பல மாதங்களாக காத்திருக்க வேண்டிய நிலை ஏற்பட்டுள்ளது.
பெரும் செலவில் தயாரிப்பு இந்த திரைப்படத்தை KVN Productions நிறுவனம் சுமார் 500 கோடி ரூபாய் செலவில் தயாரித்துள்ளது. படத்தில் நடிகர் விஜய்யுடன் பூஜா ஹெட்ஜ் , மமிதா பைஜூ உள்ளிட்டோர் நடித்துள்ளனர். தமிழ் மட்டுமல்லாமல், பல மொழிகளில் உலகளவில் வெளியிட திட்டமிடப்பட்டிருந்தது.
தணிக்கை சிக்கல் – என்ன நடந்தது?
படத்துக்கு முதலில் U/A சான்றிதழ் வழங்க பரிந்துரைக்கப்பட்டதாக கூறப்படுகிறது. அதற்காக சில காட்சிகளை நீக்கவும், சில வசனங்களை மவுனமாக்கவும் தணிக்கை வாரியம் அறிவுறுத்தியது. படக்குழுவும் அதனை ஏற்று மாற்றங்கள் செய்தது. ஆனால் அதன் பின்னர் திடீரென சில புகார்கள் வந்ததாக கூறி, படத்தை மறுஆய்வு குழுவுக்கு அனுப்பியதாக தகவல் வெளியானது.
நீதிமன்றம் வரை சென்ற விவகாரம்
இந்த தாமதத்தை எதிர்த்து தயாரிப்பு நிறுவனம் சென்னை உயர்நீதிமன்றத்தை அணுகியது. வழக்கில் தயாரிப்பு தரப்பு,படம் இன்னும் வெளியே வராத நிலையில் புகார் எப்படி வந்தது? என்று கேள்வி எழுப்பியது. மேலும், மறுஆய்வு குழுவுக்கு அனுப்பிய முடிவு சட்டப்படி சரியா என்ற சந்தேகமும் முன்வைக்கப்பட்டது.
மறுபுறம், தணிக்கை வாரியம் தரப்பில்,புகார்கள் வந்ததால் சட்டப்படி நடவடிக்கை எடுத்துள்ளோம் என்று விளக்கம் அளிக்கப்பட்டது. இந்த வழக்கில் இறுதியாக சான்றிதழ் வழங்க உத்தரவு கிடைக்காததால், தயாரிப்பு நிறுவனம் வழக்கை வாபஸ் பெற்றது.
மறு தணிக்கை மீண்டும் தாமதம் இதற்கிடையில், மறு தணிக்கை குழு படம் பார்ப்பதாக அறிவிக்கப்பட்டது. முதலில் மார்ச் 9-ஆம் தேதி, பின்னர் மார்ச் 17-ஆம் தேதி என மாற்றப்பட்டாலும், இன்று கூட அந்த நடைமுறை நடைபெறவில்லை என்ற தகவல் வெளியாகியுள்ளது. இதனால் படம் எப்போது ரிலீஸ் ஆகும் என்பது மீண்டும் கேள்விக்குறியாகியுள்ளது.
அரசியல் காரணமா?
இந்த படம் அரசியல் சார்ந்த கருத்துகளை பேசுகிறது என்று கூறப்படுகிறது. இதனால், தற்போதைய தேர்தல் சூழ்நிலையில் படம் வெளியீடு மேலும் சிக்கலாக இருக்கலாம் என சிலர் கருத்து தெரிவிக்கின்றனர். அதனால் தான் தணிக்கை செயல்முறை நீள்கிறது என்ற சந்தேகமும் எழுந்துள்ளது. ஆனால் இதற்கு அதிகாரப்பூர்வ உறுதிப்படுத்தல் எதுவும் இல்லை.
ஓடிடி உரிமை விவகாரம்
படத்தின் ரிலீஸ் தொடர்ந்து தள்ளிப்போவதால், அதன் ஓடிடி உரிமம் தொடர்பாகவும் மாற்றங்கள் ஏற்பட்டுள்ளதாக தகவல் வெளியாகியுள்ளது. முன்னதாக ஒப்பந்தம் செய்யப்பட்டிருந்த டிஜிட்டல் வெளியீடு தொடர்பான ஒப்பந்தம் ரத்து செய்யப்பட்டதாகவும் கூறப்படுகிறது. இது தயாரிப்பு நிறுவனத்திற்கு கூடுதல் அழுத்தத்தை ஏற்படுத்தியுள்ளது.
ரசிகர்கள் ஏமாற்றம்
பல மாதங்களாக ஜனநாயகன் படத்திற்காக காத்திருக்கும் ரசிகர்கள், இந்த தொடர்ச்சியான தாமதங்களால் கடும் ஏமாற்றத்தில் உள்ளனர். சமூக வலைதளங்களில் படம் எப்போது வெளியாகும்?என்ற கேள்வி தொடர்ந்து எழுந்து வருகிறது. விஜய் ரசிகர்கள், விரைவில் தணிக்கை முடிந்து படம் வெளியிடப்பட வேண்டும் என கோரிக்கை விடுத்துள்ளனர்.
ஜனநாயகன், திரைப்படம் தற்போது தணிக்கை சிக்கலால் முடங்கிய நிலையில் உள்ளது. மறு தணிக்கை எப்போது நடைபெறும், அதன் பின்னர் படம் எப்போது வெளியிடப்படும் என்பது இன்னும் உறுதியாகவில்லை. இந்த நிலை தொடர்ந்தால், படம் வெளியீடு மேலும் தாமதமாகும் வாய்ப்பு இருப்பதாக கூறப்படுகிறது. இருப்பினும், படக்குழு விரைவில் அனைத்து பிரச்சினைகளையும் தீர்த்து, படம் திரைக்கு வரும் என்ற நம்பிக்கையில் உள்ளது.
