தமிழக சட்டசபை தேர்தலில் தமிழக வெற்றிக்கழகம் (த.வெ.க.) 108 இடங்களில் வெற்றி பெற்று தனிப்பெரும் கட்சியாக உருவெடுத்துள்ளது. காங்கிரஸ், வி.சி.க., இந்திய கம்யூனிஸ்டு, மார்க்சிஸ்ட் கம்யூனிஸ்டு, இந்திய யூனியன் முஸ்லிம் லீக் கட்சிகளின் முழு ஆதரவுடன் த.வெ.க. ஆட்சியமைத்து, விஜய் முதல்-அமைச்சராக பதவியேற்றுள்ளார். சட்டசபையில் பெரும்பான்மையை நிரூபித்தபோது, எஸ்.பி. வேலுமணி தரப்பு அ.தி.மு.க.வினர் த.வெ.க.வுக்கு ஆதரவாக செயல்பட்டனர்.
3 அதிமுக எம்எல்ஏ ராஜினாமா விளக்கம்: தவெகவில் இணைந்ததற்கான காரணம் என்ன?
இந்த சூழலில், அ.தி.மு.க. எம்.எல்.ஏ.க்களான மரகதம் குமரவேல், பெருந்துறை ஜெயக்குமார், தாராபுரம் சத்யபாமா ஆகிய 3 பேர் இன்று தங்களது பதவிகளை ராஜினாமா செய்தனர். வேலுமணி தரப்பு ஆதரவு எம்.எல்.ஏ.க்களான இவர்கள், சபாநாயகர் ஜே.சி.டி. பிரபாகரை நேரில் சந்தித்து ராஜினாமா கடிதங்களை அளித்தனர். சபாநாயகர் ஜே.சி.டி. பிரபாகர், இந்த ராஜினாமா கடிதங்கள் சட்டசபை விதிகளின்படி முறையாக உள்ளதால் ஏற்கப்பட்டதாக தெரிவித்தார்.
இதனையடுத்து, மூவரும் இன்றிரவு பனையூரில் உள்ள த.வெ.க.வின் தலைமை அலுவலகத்திற்கு சென்று கட்சியில் தங்களை இணைத்துக்கொண்டனர். பின்னர், கூட்டாக பத்திரிகையாளர்களை சந்தித்த அவர்கள், தங்கள் ராஜினாமா குறித்து விளக்கமளித்தனர். மதுராந்தகம் மரகதம் குமரவேல் கூறுகையில், ‘நாங்கள் பதவி விலகியது சுயநலத்திற்காக அல்ல, சுயமரியாதைக்காகவே இந்த முடிவை எடுத்தோம். தமிழகத்தில் தி.மு.க.வின் ஆதரவுடன் ஆட்சியமைக்க எடப்பாடி பழனிசாமி முயன்றார். ஆனால், அந்த நிலைப்பாட்டை நாங்கள் ஏற்கவில்லை. தி.மு.க.வுடன் கூட்டணி சேர்வதில் எங்களுக்கு விருப்பம் இல்லை’ என தெரிவித்தார்.
